Kaa'aulayawaa
Kaa'aulayawaa (alijunaiki: Juego de las cabritas) Akumajünüsü ma'aka wane kashi, aapitnüshii naa wayuu shaittajanakana, aneekünüshi chi süjülüwainjachikai, "anii chi süjülüwainjachikai" münüshii naa majayünnüü shaittüinjanakana. Süntapa tia ka'ikat suttajatkalü o'u tü shaittaakat antapaatshii naa wayuukana napushua'a maalia, alialu'u. O'tta müsia tü shaittaakat. Kemiashii joo naa antüshiikana; kepeshuuna, wüirü, keesü, jero'o, katsaalia, kayawata, wayamüt, ji'irü, kayuusüma'a, yosuma'a, jayajaya, sü'ü aliita, asalaa tulujashi, shi'iruku kaa'ula. Waimainjatü tü eküütkat. kettaainjatü sümaa wane kashi, ayonnajüsü ayonnajakalia, e'irajüsü e'irajakalia, olojüsü olojokalia, o'ttüshii waneepia wanaa nümaa neepeerajaain kaika'i, sunainmüin maalia. Sülü'ülapa süpüla jakütüin, asaayaa mushii naa jima'aliikana namaa naa najuluwainkana, ni'irainru'usü nünüiki.
